ILOILO CITY – Wala pa sa gihapon sang tul-id nga impormasyon nga nakuha ang mga pulis gikan kay Atty. Angelo Karlo Guillen, ang National Union of Peoples’ Lawyers (NUPL)-Visayas assistant vice president kag NUPL-Panay secretary-general, nga nabun-an sa General Luna St., Iloilo City Proper.
Sa interview sang Bombo Radyo kay Police Major Mark Evan Salvo, station commander sang Iloilo City Police Station 1, iya ginpahayag nga indi maghatag sang statement si Atty. Guillen bangud nagapaayo pa ini sa isa ka ospital diri sa syudad sang Iloilo.
Matandaan nga sang Marso 3 sang gab-i, ginbuno sang unidentified suspects si Atty. Guillen sa iya dungan-dungan gamit ang screwdriver.
Gin-refer ang mga pulis sa tiyo ni Atty. Guillen nga nagatrabaho sa Public Attorney’s Office apang wala man natigayon nga naistorya sang imbestigador bangud naka-leave pa ini.
Suno kay Salvo, luyag kuntani matul-id sa imbestigasyon kun ano pa ang sulod sang sling bag kag backpack ni Atty. Guillen nga nakuha sang mga suspek sang natabo ang krimen.
Usisaon man sang mga pulis kun ano nga mga kaso ang ginauyatan subong sang nasambit nga abogado agud matumod kun work-related ang insidente.
Santo sa inisyal nga imbestigasyon sang mga pulis, robbery ang nagagwa nga rason.
