Ginapaabot na ni Department of Trade and Industry (DTI) Secretary Christina Roque nga madamo pa gid nga opisyal sang ila attached agency nga Philippine Contractors Accreditation Board (PCAB) ang magapanaog sa ila pwesto sa palaabuton nga mga adlaw.
Ini pagkatapos nga nag-resign ang executive director sang board nga si Herbert Matienzo kag duha pa ka iban nga miyembro.
“We’re still expecting more resignations in the next few days, effective immediately also,” pahayag sang tiglikom sa atubang sang reporters.
Ini ang sa tunga man sang kontrobersiya kaangot sa ginaalegar nga anomaliya sa flood control projects sang gobyerno.
Sa hearing sang House Infrastructure Committee sang Martes, matandaan nga nagpanawagan si House Deputy Speaker Jefferson Khonghun nga ipa-lifestyle check si Matienzo bangud sang alegasyon nga “registration for sale.”
Isa ang PCAB sa implementing boards sang Construction Industry Authority of the Philippines nga sa idalom sang pagdumala sang DTI.
Nagpasalig naman ang ahensya nga ipaguwa nila ang kabug-usan nga listahan sang mga kumpaniya nga mawad-an sang lisensya kadungan sang ginapatigayon nga kumprehensibo nga imbestigasyon sa mga ginaalegar nga anomaliya nga may kaangtanan sa accreditation sang mga kontraktor.
Sa subong, gin-revoke na sang board ang lisensya sang siyam ka construction firms nga ginapanag-iyahan ni Sarah Discaya.#
