Ginbuyagyag ni Atty. Raymond Fortun nga mas madamo pa nga senador nga ginapahayag involved sa iskandalo sa mga flood control projects sa Bulacan ang posible nga mapangalanan sa mga masunod nga adlaw.
Suno kay Fortun, nga nagaserbe nga legal counsel ni anay Bulacan 1st District Engineering Asst. Chief Brice Hernandez, nabusisi na niya ang iban sa mga sensitibo nga dokumento nga nauyatan sang iya nga kliyente nga nagaunod sang mga impormasyon tuhoy sa lapnagon nga network sang korapsyon sa mga flood control project sa nasambit nga probinsya.
Kalakip diri ang pangalan sang anom nga senador kun sa diin apat sa ila ang yara sa posisyon (incumbent) samtang ang duwa ang wala na sa serbisyo.
Una na na naulamid ang pangalan nanday Sen. Jingoy Estrada kag Sen. Joel Villanueva sa mga nauna nga hearing sang Senado tuhoy sa flood control scandal.
Apang sa testimoniya naman ni anay District Engineer Henry Alcantara, namitlang man ang pangalan ni anay Sen. Ramon ‘Bong’ Revilla.
Sa bahin naman sang mga kongresista, magluwas kanday Rep. Zaldy Co kag iban pa nga una na nga napangalanan, may pila pa gid nga wala pa mabuyagyag apang nalakip sa mga dokumento nga yara kay Hernandez.
Ang mga nasambit nga dokumento, suno kay Atty. Fortun, ang pareho nga ihatag sa Independent Commission on Infrastructure kag sa Senado, agud mangin ebidensiya sa madalom nga imbestigasyon kag dalayon nga pag-file sang kaso.
Pahayag niya, ang mga ini ang lunsay sa isa ka distrito lamang sang Bulacan nga sakop sang opisina ni Hernandez kag indi pa kaupod ang mga flood control project sa bilog nga pungsod nga mahimo ginapanginpuslan man sang iban pa nga mga mamalidha.
Base sa mga dokumento nga yara kay Hernandez, ang mga nasambit nga mamalidha ang lunsay nakabaton sa kickback system nga natabo sa nasambit nga distrito.
