Nagpangayo sang pasaylo ang kontraktor sang Ungka flyover kasunod sang mga reklamo sang mga motorista nga nagakahulugan sila sang debris halin sa gina-rectify nga proyekto.
Kadungan ini sang ginpatigayon nga investigation in aid of legislation sang Sangguniang Panlalawigan.
Suno kay Mr. Maximo Pareja, representative sang International Builders Corporation, gin-athag niya nga may ginbutang man sila nga safety nets agud malikawan nga may mahulogan sang debris sa mga nagalabay sa idalom.
Apang, gin-ako niya nga nagkalagisi na ang iban.
Dugang niya nga sa subong, gina- improve nila ang ila safety measures.
Indi naman kumporme si 2nd District Board Member June Mondejar sa sabat ni Pareja.
Suno kay Mondejar nga chairman sang Committee on Public Order and Security, base sa iya obserbasyon, indi effective kag pasapayan lang ang safety measures sang kontraktor.
Nagpangabay ini sa IBC nga maluoy man sila sa publiko kag indi lang pagdal-on sa aregluhanay kun may yara sang mahalitan.
