ILOILO CITY–Ginaduso sang IBON Foundation nga nagakadapat islan ang Tax Reform for Acceleration and Inclusion (TRAIN) Law.
Sa interview sang Bombo Radyo kay Sonny Africa, Executive director sang IBON Foundation, iya ginpahayag nga tuman ka sala ang disenyo sang TRAIN law sa diin buhinan ang buwis sang manggaranon kag pataason ang buwis sang mga pigado.
Nagpanugyan si Africa sa gobyerno nga kun tani islan sang bag-o nga layi ang TRAIN law sa diin sukton lang sang buwis ang mga may ikasarang nga magbayad.
Suno kay Africa, ginapaguwa lang sang Duterte Administration nga ipauntat ang Train Law subong apang ang matuod amo nga sa masunod pa nga tuig.
Samtang, ang padayon nga pagtaas sang buwis sa gatong ang nakit-an nga rason sa pagtaas sang mga nagapanguna nga balaklon.
Suno kay Africa, ang TRAIN Law ang rason kun nga-a nagsaka ang presyo sang gatong sa diin naapektuhan ang mga utan, isda, manok, baboy kag bugas.
Sa pagkamatuod, naga-import pa ang Pilipinas sang bugas sa iban nga pungsod bangud nagakulang sa gihapon ang mga supply bisan pa nga may mga mangunguma man ang pungsod.
Suno kay Africa, wala ginahatagan sang gobyerno sang suporta ang mga mangunguma.
Dugang pa sang natungdan, gamay na lang ang mangunguma subong.