Ginakabig sang IBON Foundation, isa ka non-profit research, education, kag information-development institution nga pamulitika ang pagbaligya sang Department of Agriculture (DA) sang bugas sa presyo nga P20 kada kilo sa Visayas.
Sa interview sang Bombo Radyo kay Jose Enrique Africa, executive director sang IBON Foundation, iya ginpahayag nga ang pagpanubo sang presyo sang bugas ang isa lamang ka gimmick kag luyag lang mapagwa nga natuman na ang ginpromisa ni President Ferdinand Marcos sang 2022 elections.
Suno kay Africa, ginhimo lang ini sang administrasyon agud nga pataason liwat ang trust kag performance ratings sang Presidente, nga nagnubo base sa pinakaulihi nga survey sang Pulse Asia Research.
Sa nasambit nga survey, nagnubo sang 17% ang approval rating ni Marcos halin sa 42% sang Pebrero kag sang Marso, nagnubo nalang ini sa 25%.
Ang pilot launch sa pagbaligya sang P20 kada kilo sang bugas sa Visayas ang kasunod sang closed-door meeting ni Marcos kaupod sang 12 ka gobernador sa Visayas nga ginhiwat sa Cebu Provincial Capitol.
Ginklaro pa ni Africa nga ang programa ang limitado lang sa mga pigado nga pumuluyo nga kwalipikado sa idalom sang Kadiwa program, nga amo lang ang makabakal sang P20 nga bugas.
Base sa data sang National Food Authority (NFA), may yara lamang sang 358,000 metric tons sang rice stocks, kun sa diin para lang ini sa masobra siyam ka adlaw nga mas manubo pa sa target nga 15 ka adlaw nga national rice buffer stock.
