Ginakabig sang Iloilo City Anti-Smoking Task Force (ICAST) nga “alarming” ang paglapta sang liquid marijuana sa mga vape shop sa Iloilo City.
Sa interview sang Bombo Radyo kay ICAST Director Inigo Garingalao, iya ginpahayag nga kinahanglan sang mas hugot nga koordinasyon sa tunga sang nagkalain-lain nga ahensya agud ma-monitor ang mga vape shops kag malikawan ang paglapta sang mga produkto nga may illegal substance.
Ini kasunod sang pagkadakop sang isa ka drug dealer sa Barangay San Pedro, Molo nga ginasuspetsahan nga nagabaligya sang high-grade marijuana.
Suno kay Garingalao, limitado ang mandato sang ICAST sa pagmonitor sang smoking kag vaping, ilabi na sa mga pampubliko nga lugar.
Indi man matumod gilayon sang ICAST kun ang ginagamit sa isa ka vape device may yara sang illegal nga droga, bangud wala sila sang training ukon kapasidad sa pag-identify sini kag sa pagdeterminar kun ano ang husto nga response sa kapulisan.
Apang, ginpahayag ni Garingalao nga bukas ang ICAST sa pagpa-training sang ila mga personnel kun ini ang ipatuman sang City Government.
Panawagan man ni Garingalao sa mga ginikanan nga hugot nga bantayan kag i-monitor ang ila mga kabataan, ilabi na bangud mahimo sila mangin vulnerable sa smoking, vaping kag paggamit sang iban nga substance.
Nagapanawagan man ang opisyal sa FDA, DTI, City Health Office, Business Permits and Licensing Office kag Iloilo City Police Station nga magpatigayon sang joint inspection sa mga vape shops.
Ini agud masiguro nga nagasunod ang mga establisemento sa regulasyon kag agud mabaskog nga kampanya batok sa smoking, vaping kag paggamit sang illegal substance, ilabi na sa mga kabataan.
By: Bombo Cyrene Nasis
