Ginapabaskog sang Iloilo City Anti-Smoking Task Force ukon ICAST ang ila awareness kag prevention campaign batok sa cigarette smoking kag vaping, ilabi na sa mga high school students.
Sa interview sang Bombo Radyo kay ICAST City Director Iñigo Garingalao, iya ginpahayag nga importante nga maprotektahan ang kabataan bangud sa sini nga edad mahimo magtubo ang curiosity nga magtulod sa ila nga i-try ang paggamit sang nicotine.
Iya ginpahayag nga kon masuguran ang paggamit sang nicotine sa gamay pa lang nga edad, mahimo nga magpadulong ini sa addiction.
Gani, ginapasangkad sang ICAST ang kampanya sa mga eskwelahan, lakip na ang pag-engage sa mga manunudlo kag school administrators para sa mas istrikto nga policies kag padayon nga information drive.
Suno pa kay Garingalao, posible nga maglawig tubtob sa masunod nga henerasyon ang epekto sang nicotine use kon ang kabataan mangin regular nga smoker ukon vape user.
Gane sa subong pa lang importante nga matapna na ini paagi sa ila mga aktibidades nga ginapatigayon.
Ginhingyo man sang ICAST ang kooperasyon sang medical students, medical societies kag respiratory care practitioners sa pagpalapnag sang edukasyon nahanungod sa peligro sang smoking kag vaping.
