GUIMARAS – Nag-umpisa na ang lihok ang Guimaras Provincial Government sa tuyo nga mangin smoke-free ang bug-os nga probinsya.
Ini ang kasunod sang pagpakigsapol sang mga miyembro sang Iloilo City Anti-Smoking Task Force sa Local Government Unit sang Jordan tuhoy sa pagpatuman sang Anti-Smoking campaign.
Sa interview sang Bombo Radyo kay Iloilo City Anti-Smoking Task Force Head Iñigo Garingalao, iya ginpahayag nga sa Disyembre 13 tubtub14, magapatigayon sang enforcement training tuhoy sa anti-smoking kun sa diin istoryahan kun paano mangin madinalag-on ang nasambit nga adbokasiya sang Guimaras Provincial Government.
Suno kay Garingalao, una nga ipatuman ang Anti-Smoking sa banwa sang Jordan nga ginakabig sentro sang komersyalismo sa probinsya sang Guimaras.
Ginpahayag ni Garingalao nga may yara na sang ordinansa sa probinsya sang Guimaras apang kinahanglan nga ipaidalom sa training ang law enforcers agud nga mangin epektibo ang pagpatuman sini.
Pagkatapos sang awareness campaign, ginpahayag sang natungdan nga ipatuman na ang pagpangdakop sa mga nagalapas sa nasambit nga pagsulundan.
Amat-amat lang ang pagpatuman sang Anti-Smoking tubtub nga malikop ang tanan nga banwa sa probinsya sang Guimaras.
