Naka-record ang Iloilo City Anti-Smoking Task Force ukon ICAST sang kapin 4,160 ka violators sang anti-smoking kag vaping ordinance sang syudad halin sang bulan sang Hunyo tubtob Setyembre 15, 2026.
Sa interview sang Bombo Radyo kay Iñigo D. Garingalao, City Director sang ICAST, iya ginpahayag nga ila ginatingwaan nga mapanubo ang ini nga record paagi sa padayon nga inspeksyon kag pagpatuman sang ordinansa.
Suno pa kay Garingalao, tatlo ka grupo sang ICAST ang ginapalibot sa nagkalain-lain nga lugar sang syudad agud magmonitor kag mag-inspeksyon, ilabi na sa mga establisyemento nga may paglapas sa anti-smoking kag vaping ordinance.
Nahibaluan nga 3,480 na ang na-record nga violators halin Hunyo tubtob Agosto, samtang sa bulan sang Setyembre, naglab-ot sa 617 ang na-apprehend bangud sa cigarette violations kag 67 naman ang may kaangtanan sa vape.
Pahayag pa ni Garingalao nga indi lamang ini responsibilidad sang ICAST kag nagapangayo sila sang kooperasyon halin sa nagkalain-lain nga sektor kag sa publiko.
Padayon naman ang kampanya sang Iloilo City Government agud mapalab-ot sa natungdan ang ini nga problema kag malikawan ang mga peligro kag perwisyo nga dala sang pagpanigarilyo kag vaping.
