ILOILO CITY – Kapin sa 70% na nga makabig nga Smoke-free City ang syudad sang Iloilo.
Sa interview sang Bombo Radyo kay Iloilo City Anti-Smoking Task Force Executive Director Iñigo Garingalao, iya ginpahayag nga sa subong, padayon ang masangkad nga kampanya sang Iloilo City Government agud nga mahagan-hagan ang pagpanigarilyo ilabi na sa pampubliko nga lugar.
Suno kay Garingalao, nakabulig man sang daku ang pagpatuman sang Executive Order 46 ukon ang General Bar Guidelines ilabi na subong nga gindula na ang Liquor Ban.
Sa pihak sang masupog nga kampanya sang nasambit nga Task Force, ginpahayag ni Garingalao nga may yara sa gihapon sang mga nagapanigarilyo bangud man sa madata nga baligyaanay sang nasambit nga produkto ilabi na nga available naman ang nanari-sari nga eletronic cigarette.
Ginpahayag ni Garingalao nga mas nabutang sa peligro ang mga tawo nga nagahaklo sang aso sang sirailyo ukon ang ginatawag nga secondhand smoke.
Ang pagpatuman sang tobacco control suno sa natungdan ang isa ka mabudlay nga trabaho bangud nga ang siragarilyo ang kabahin na sang kultura, gawi tubtub nga nagresulta sa addiction.
Sa pihak sini, padayon ang kampanya sang Iloilo City Anti-Smoking Task Force agud nga malab-ot ang Smoke-free Iloilo City.
Samtang, nagdepensa naman si Garingalao tuhoy sa hagna nga ginduso sadto sa Iloilo City Council nga mas pasulabihon ang mga job applicant nga wala nagasigarilyo.
Suno kay Garingalao, wala pa siya sang update tuhoy sa status sang nasambit nga hagna nga ginduso ni Iloilo City Councilor Candice Tupas apang para sa iya, indi ini makabig nga diskriminasyon.
Sa pagpaathag ni Garingalao, wala man nakasaad sa nasambit nga hagna nga indi na pagbatunonm bilang job hire ukon empelyado sang Iloilo City Hall ang mga nagapanigarilyo kundi mas ginapasulabi ang non-smokers.
Ini ang kabahin man suno sa natungdan sa kampanya sang Iloilo City Government nga Smoke-free community.
