Umpisahan na sang International Criminal Court subong nga adlaw, Pebrero 23, ang confirmation stage ukon ang confirmation of charges hearing sa kaso nga crimes against humanity batok kay former President Rodrigo Duterte.
Matabo ini sa 10:00 sa aga (The Hague local time) sa Pre-Trial Chamber I ukon alas singko sa hapon oras naman sa Pilipinas.
Pangunahan ini nanday Presiding Judge Iulia Antoanella Motoc kag duha ka iban pa nga judges nga sanday Reine Adélaïde Sophie Alapini-Gansou kag María del Socorro Flores Liera.
Ginklaro sang korte nga indi pa ini trial kundi pre-trial hearing pa lamang. Ang tuyo sang confirmation of charges hearing amo ang pagtumod kun may yara bala sang bastante nga ebidensya agud maestablisar ang substantial grounds agud patihan nga si Duterte nakahimo gid man sang mga krimen nga amo ang nakabutang sa akusasyon.
Bisan nga nakapasa na ang prosecution sang lista sang mga ebidensya sang nag-apply sila sang warrant of arrest, diri pa lamang nga stage diskusyunan ang mga merito sang kaso.
Apat ka adlaw ang hearings kag ginpahat-pahat sa tatlo ka sessions.
Pagkabukas sang confirmation hearings subong nga aga, may yara sang opening statement halin sa prosecution, kag pagasundan sang break. Ang second session (6:30 p.m. to 7:30 p.m. PST) amo naman ang opening statements halin sa common legal representatives sang victims kag ang opening statement sang defense.
Ang third and final session subong nga adlaw (9 p.m. to 10 p.m. PST) ang ginpain naman para sa submissions sang prosecution sa merito sang kaso.
Antes sini nga hearing, natabo ang initial appearance ni Duterte sa chamber sang Marso 14, 2025.
Sang 8 Setyembre 2025, gin-postpone sang chamber ang confirmation hearing nga una nga ginplano nga magsugod sa Setyembre 23, 2025. Ini kasunod sang Adjournment Request sang Defense team bahin sa ikaayong-lawas ni Duterte.
Sang Enero 26, 2026, ginpahayag sang Pre-Trial Chamber I nga si Duterte dapat kag fit nga magpartisipar sa pre-trial proceedings. Didto kag gin-anunsyo ang pagsugod sang confirmation of charges hearing sa Pebrero 23. Apisar nagapanindugan ang Defense nga maluya kag malipaton ang 80-anyos nga former president, nagdesisyon ang Chamber nga dayunon ini bangud sa nakabutang sa report sang medical experts nga makahangop pa si Duterte pati sa mga kaso nga iya ginaatubang kag mga ebidensya nga kalakip sini.#
