Gin-athag sang spokesperson sang International Criminal Court nga ang 43 alleged extrajudicial killings sa Pilipinas nga naangot sa kaso ni former President Rodrigo Duterte ang sample gid lamang, kag mas madamo nga kaso ang mahimo ipresentar sa korte.
Suno kay ICC spokesperson Fadi El Abdallah, ang masunod nga tikang nga confirmation of charges hearing nga na-schedule sa September, amo ang magapadalom pa sang kaso kag kun matapos na nga pamatian ang defense, sunod nga magadesisyon kun ini nga kaso ang magadiretso sa trial ukon indi.
Pahayag niya, nagakahulugan ini nga ang prosecution sarang mag- request sang dugang nga mga kaso kag mga testigo samtang padayon ang proseso.
Sang March 12 situation report sini sa Pilipinas kag kay Duterte, ginsiling sang ICC nga ang Pre-Trial Chamber I ang nag-assess sang mga materials nga ginpasa sang Prosecution kag may nakit-an sila nga reasonable grounds nga patihan nga si Duterte ang individually responsible bilang indirect co-perpetrator para sa crime against humanity of murder, nga gin-alegar nakumiter sa Pilipinas sa tunga sang November 1, 2011 kag March 16, 2019.
Dugang sini nga ang ICC Pre-Trial Chamber ang nag-focus sa sample sang alleged incidents agud mag-facilitate sang analysis kag issuance sang arrest warrant batok sa former leader.
