Gin-aprubahan sang International Criminal Court (ICC) ang request sang kampo ni former President Rodrigo Duterte nga i-suspinde anay ang pag-desisyon sa ila petisyon nga naangot sa interim release.
Nagakahulugan ini nga ipaiway anay sang korte ang pagpaguwa sang desisyon kun bala pasugtan sini ang anay presidente nga mahatagan sang temporaryo nga kahilwayan.
Sa majority decision sang Pre-Trial Chamber 1, hatagan anay sang tyempo ang legal team ni Duterte nga magtipon kag magpasa sang mga dugang nga impormasyon nga ginakabig nila nga importante para sa ila petisyon.
Tatlo ka judges ang nagsugot sa suspensyon sang desisyon.
Matandaan nga nag-apply ang kampo ni Duterte sang interim release sang Hunyo 12 bangud sa “humanirian reasons” kun sa diin gin-cite ang edad sang anay presidente nga subong 80-anyos na. Pareho ini nga ginpunggan sang prosekusyon kag sang Office of Public Counsel for Victims (OPCV).
Sang Hulyo 14, nagpasaka liwat ang kampo ni Duterte sang “urgent request” kun sa diin ila gin-ayo nga indi anay magdesisyon kaangot sa ila una nga request bangud may delay sa ila pagkuha sang dugang nga importante nga impormasyon.
Ginkontra naman liwat sang prosekusyon ang deferment request bangud suno kay Deputy Prosecutor Mame Mandiaye Niang, nagsumite sang petition for interim release ang kampo sang anay presidente bisan nahibaluan nila nga indi kumpleto ang ila nga mga dokumento.
Nahibaluan nga natalana sa Septyembre 23, 2025 ang confirmation of charges kay Duterte. Marso 11 subong nga tuig siya sang gindakop diri sa Pilipinas kag gindala sa The Hague, Netherlands bangud sa kaso nga crimes against humanity.
