Gin-anunsyo sang International Criminal Court (ICC) nga gin-postpone ang hearing sa confirmation of charges batok kay former President Rodrigo Duterte.
Septyembre 23 kuntani magasugod ang confirmation hearing, apang suno sa korte, nag-desisyon ang Pre-Trial Chamber 1 nga i-postpone ini kasunod sang request sang “indefinite adjournment” nagikan sa defense team sang anay presidente.
Base sa kampo sang anay punong ehekutibo, indi “fit” si Duterte nga maka-atubang sa trial.
Suno sa korte, majority sang Chamber ang nagpasugot sang “limited postponement” sa hearing para nga may supisyente nga tion nga ma-adjudicate ang request.
“Following a request from the Defence of Mr Duterte for an indefinite adjournment of the proceedings alleging that Mr Duterte is not fit to stand trial, the majority of the Chamber considered that a limited postponement of the hearing on the confirmation of charges was warranted to allow sufficient time to adjudicate the request and related matters,” pahayag sang ICC.
Ginkumpirma man sang korte nga nagpaguwa sang lain nga opinyon si Judge María del Socorro Flores Liera kun sa diin ginpahayag sini nga dapat i-reject ang request sang defense team, kag padayunon ang pre-trial proceedings.
Wala pa ginsapubliko kun ano gid ang basehan sang team ni Duterte sa ila nga request para sa indefinite adjournment kag kun ngaa indi ini “fit” sa trial.
Ginsiling man sang korte nga i-anunsyo lang nila ugaling kun san-o isaylo ang schedule para sa confirmation hearing. Sa sini nga hearing ma-establisar kun may yara sang bastante nga ebidensya nga maka-establish sang “substantial grounds” agud mapatihan nga nahimo sang akusado ang krimen nga gin-akusar sa iya nga iya nakomiter.
Marso 11 sang gindakop si Duterte kag gindala sa The Hague, Netherlands sa gahum sang arrest warrant sang ICC bangud sang ginaalegar nga crimes against humanity kasunod sang iya maduguon kag kontrobersyal nga drug war.
Antes ang amo nga development, nakatambong pa si Duterte sa hearing sang Kamara kag Senado sa imbestigasyon sa drug war campaign. Sa quad-committee sang House of Representatives sang Nobyembre, nagsiling pa ang former president nga boluntaryo pa siya nga magakadto sa The Hague kag “sipaon” [ang ICC].
Nahibaluan nga may pending request man ang iya kampo para sa interim release.#
