ILOILO CITY – Ginalantaw ni Iloilo City Mayor Jerry Treñas ang Iloilo Convention Center nga mangin isolation facility sang mga Persons Under Monitoring.
Suno sa alkalde, sa tion nga magdamo ang Persons Under Monitoring sa syudad, magakinahanglan gid sang dako nga isolation facility.
Pahayag niya, sa kada may mag positibo sa Coronaviru Disease 2019, ang tanan nga naka contact ang makabig gilayon nga PUM ilabi na kun ang tawo ang wala nakahibalo nga PUM ini kag padayon sa gihapon nga nagalagaw, pat-od nga madamo ang mangin apektado.
Indi pagpakulba ang katuyuan sang alkalde sa baylo nagapreparar lamang ang Iloilo City Government sa mga posible nga matabo.
Padayon man nga nagapakig-angot si Mayor Treñas kay Iloilo Gov. Arthur Defensor Jr.
Sa pagkamatuod, may yara sang suhestyon ang gobernador bangud magaabot ang pila ka mga Overseas Filipino Workers sa Iloilo kag luyag kuntani sini nga ibutang temporaryo sa isa lang ka hotel ang mga OFW.
Suno kay Treñas, kun masarangan man lang sang Overseas Workers Welfare Administration nga ipahamtang ang mga Overseas Filipino Workers sa hotel, wala sang mangin problema sa alkalde.
Apang ang luyag lang ni Treñas nga ipaidalom sa gihapon sa 14-day quarantine ang mga Overseas Filipino Workers sa hotel.
