Ginklaro sang International Criminal Court (ICC) nga ginasiguro sang korte ang ikaayong lawas sang mga indibidwal nga yara sa ila nga detention center sa The Hague, Netherlands.
Kabahin ini sang statement ni ICC spokesperson Fadi el Abdallah matapos nagguwa ang impormasyon halin sa pamilya ni anay Presidente Rodrigo Duterte nga tuman na gid ini ka niwang subong.
Pahayag naman ni Abdallah, magluwas sa pagpasiguro nga may mga tikang sila para sa ikaayong lawas sang tanan nga yara sa detention center, indi na sila mahimo maka-komento sa lawas ukon anuman nga bagay kaangot sa mga suspek agud nga respetuhon man ang ila pribado nga kabuhi.
“The ICC adopts all necessary measures to take care of the health and well-being of suspects who are in the ICC detention center,” pahayag ni el Abdallah. “We do not provide further comments on these matters in order to fully respect their private life.”
Matandaan nga ang anay asawa ni Duterte nga si Elizabeth Zimmerman ang nagsiling nga daw panit kag tul-an na lang ang anay punong ehekutibo subong.
Mangin si Vice President Sara Duterte nga nagbisita man sa The Hague sang nagligad nga adlaw ang nagsiling man nga daw may sakit ang itsura sang iya amay, apang wala man sang ginahambal ang medical officer nga urgent ang iya kondisyon.
Matandaan nga gin-aresto si Duterte sang Marso 11 sa kaso sini nga crimes against humanity. Natalana ang confirmation of charges sa Septyembre 23, 2025.
