Ginbuyayaw ni Presidente Rodrigo Duterte ang International Criminal Court (ICC) kag ginpahog pa nga tampaon ang mga hukom sang korte.
Ini ang pahayag sang presidente isa ka semana matapos ang rekomendasyon sang chief prosecutor sang ICC nga buksan ang pormal kag kumpleto nga imbestigasyon sa ginapahayag lapnagon nga pagpamatay sa drug war sang Duterte Administration.
Sa iya taped briefing kagab-i, ginhinambit pa ni Duterte ang pangalan ni ICC chief prosecutor Fatou Bensouda apang nag-untat man siya sa paghambal bangud suno sa iya indi niya luyag nga mang-insulto.
Suno pa kay Duterte, handa siya nga mag-atubang sang akusasyon apang himuon niya ini sa atubang sang korte sa Pilipinas kag sa atubang sang Filipino judge.
Ginsulit man niya ang iya nauna na nga pahayag nga ang Pilipinas indi miyembro sang ICC.
Madumduman nga 2018 sang nag-order si Duterte sang withdrawal halin sa amo nga korte.
Indi ini ang una nga kahigayunan nga gin-insulto kag ginpahog ni Duterte ang ICC officials.
Sang 2018, gintawag niya ang mga hukom sa ICC nga mga pedophiles kag ginpahog man niya si Bensouda nga arestuhon kun magtapak ini sa Pilipinas.
