Mahibaluan na 5:30 karon sa hapon ang desisyon sang International Criminal Court (ICC) Appeals Chamber kaangot sa petisyon ni former President Rodrigo Duterte para sa interim release.
Nagpirma sang waiver si Duterte agud indi na siya kinahanglan magtambong — pisikal man ukon virtual.
Ginkumpirmar sang ICC nga ang iya abogado nga si Nicholas Kaufman ang magatindog sa iya bilang representante sa hearing.
Naka-detain ang anay punong ehekutibo sa Scheveningen Prison sang ICC sa The Hague, Netherlands umpisa sang gindakop siya sa NAIA sang Marso 11, 2025.
Ang kaso nga ginaatubang ni Duterte amo ang crimes against humanity nga ginaangot sa extrajudicial killings sang tion nga ginlunsar sini ang drug war kag ang mas nauna nga mga operasyon sa Davao sa pagpanguna sang “Davao Death Squad.”
Ginapanindugan sang iya kampo nga indi na ini makasarang mag-atubang sa trial bangud sa iya katigulangon. Sa ila petisyon sa korte, ginsiling nga malipaton na ang former president, gani nga nagmandu ang ICC sang medical examination.
Pananglitan baliskadon sang Appeals Chamber ang ruling sang ICC Pre-Trial Chamber kag tugutan ang interim release, ipaidalom si Duterte sa istrikto nga mga kondisyon sa idalom sang Rule 119 sang ICC Rules of Procedure and Evidence. Lakip diri ang istrikto nga limitasyon sa pagbyahe, pagpuyo sa court-approved address, pagdumili sa iya nga makig-angot sa mga biktima kag mga testigo, kag mandatory appearances sa atubang sang awtoridad.#
