Nagpaguwa ang International Criminal Court (ICC) sang warrants of arrest batok kanday Israeli Prime Minister Benjamin Netanyahu, former Defense Minister Yoav Gallant, kag isa ka senior Hamas official.
Suno sa korte, may nakit-an ini nga rasonable nga mga basehan agud patihan nga may criminal responsibility si Netanyahu sa war crimes lakip na ang pagpagutom sa mga tawo kag crimes against humanity kaangay sang murder, persecution, kag iban pa nga indi makatawo nga mga aktwasyon.
Maragtason ini nga warrant bangud sa masobra pito ka dekada nga kumplikto sa tunga sang Israel kag Palestinians, si Netanyahu ang una nga Israeli leader nga gindagdagan sang kaangay nga order sang international court.
Wala sang gahum ang ICC nga makaaresto, apang ang warrant ang mahimo maka-limit sang pagbyahe ni Netanyahu bangud indi siya pwede makatapak sa mga pungsod nga miyembro sang korte.
Ang Israel kaangay man sa Estados Unidos nga indi man miyembro sang ICC kag ginhangkat pa sini ang hurisdiksyon sang korte sa Gaza war. Apang ginbasura sang court ang challenge sang Israel kag nag-claim nga may hurisdiksyon ini sa mga teritoryo nga ginasakop sang Israel lakip ang Gaza, ang East Jerusalem, kag ang West Bank.
Magluwas kay Netanyahu, may warrant man batok sa Hamas official nga si Mohammed Diab Ibrahim Al-Masri ukon si Mohammed Deif nga isa sa ginatudlo nga masterminds sa atake sa southern Israel sang Oktubre 7, 2023. Gin-anunsyo anay sang Israel nga napatay na nila si Deif sang Septyembre paagi sa airstrike apang wala ini ginkumpirma sang kampo sang Hamas.
Suno sa ICC, responsable si Deif sa “crimes against humanity” lakip na ang murder, extermination, torture, kag rape kag iban pa nga porma sang sexual violence, amo man sa war crimes sang murder, cruel treatment, torture, taking hostages, outrages upon personal dignity, kag rape kag iban nga porma sang sexual violence.
Nahibaluan nga kun ma-isyu na sang ICC ang arrest warrant, nagapadala ini sang requests for cooperation sang member states.
Wala ini sang kaugalingon nga police force agud nga makapangdakop gani nagasalig ang korte sa member states agud ma-execute ini kag legally obliged ang state parties nga himnuon ini.
Nahibaluan nga 13 ka bulan na ang gyera sang Israel sa Gaza bilang balos sa pagsalakay sang Hamas sang October 7, 2023. Sa ila paglunsar sang pagtimalos, 44,000 ka Palestinians ang nagkalamatay.#
