Nagsumiter na naman sang ikapito nga batch sang ebidensya ang International Criminal Court (ICC) batok kay anay President Rorigo Duterte sa ginapangatubang nga kaso sang crimes against humanity bangud sa iya kontrobersyal nga kampanya kontra droga.
Sang Mayo 30, nagsumite ang mga piskal sang dugang nga 129 ka dokumento nga nagdala sang kabug-usan nga ebidensya nga nasumiter sa 396 umpisa sang magsugod ang opisyal nga disclosure phase sang Abril 30.
Suno kay ICC Prosecutor Karim Khan, bisan temporaryo siya nga naka-leave bangud sa ginapangatubang man nga imbestigasyon batok sa iya, padayon ang operasyon sang opisina niya. Ginklaro man sang prosecution nga kapin 130,000 ka mga dokumento ang yara subong sa ila relativity database, kag kada isa sini kinahanglan mag-agi sa legal nga proseso antes pormal nga isumite sa korte.
Gin-set ang deadline sang prosecution tubtob Hulyo 1 agud makumpleto ang pagsumiter sang tanan nga ebidensya. Ini nga preparasyon ang kabahin sang ginaplano nga hearing sa Setyembre 23.
Madumduman nga gin-aresto si Duterte sang Marso 11, bangud sa ginapahayag nga libo-libo nga extrajudicial killings nga natabo sa iya kampanya kontra droga. Suno sa mga human rights groups, masobra 30,000 ka tawo ang ginapatay sa nasambit nga kampanya.
Subong, yara si Duterte sa ICC detention facility sa The Hague, samtang ginapadayon ang proseso sang kaso.
