Naghingyo ang Office of the Prosecutor sang International Criminal Court (ICC) sa pre-trial chamber nga maghatag sang extension sa deadline sa pagpasa sang mga materyales halin sa mga testigo batok kay former President Rodrigo Duterte.
Ini nga request ang ginhimo sang Mayo 14 kag pirmado ni ICC chief prosecutor Karim Khan.
Base sa pangabay sang prosecution, ginapalawig ang disclosure deadline sa July 1, 2025 nga amo ang petsa nga gintalana sang korte agud nga makumpleto ang disclosure process.
Sa amo man nga request, nagpahayag man ang prosecution nga i-isol man sa Hunyo 20, 2025 ang pinal nga deadline agud maka-apply sa chamber nga hawidan ang identity sang witnesses. Ginarason sini nga delikado ang pagbulgar sang identity sang mga testigo.
Pahayag pa sini, ang ila nga request para sa extensions ang rasonable man kag consistent sa kinamatarong ni Duterte kag kinamatarong sang mga magapungko nga witnesses.
Matandaan nga gin-schedule sang chamber ang confirmation of charges batok kay Duterte sa Septyembre 23, 2025.
Marso 11 siya gindakop kag gindala sa The Hague bangud sa kaso nga crimes against humanity nga nag-ugat sa extrajudicial killings sang ginpatuman sini ang drug war.
