ILOILO CITY – Nagpaandam ang Department of Trade and Industry sa publiko nga mangin mahinalungon sa pagbakal sang Christmas lights.
Sa interview sang Bombo Radyo kay Department of Trade and Industry Chief Consumer Protection Division Region 6 Felisa Judith Degala, iya ginpahayag nga mahimo na nga mahibaluan sang publiko kun legal ukon ilegal ang produkto nga ginabaligya.
Suno kay Degala, kinahanglan lang nga i-download ang ICC Verification Mobile App sa cellphone kag mahimo na nga i-scan ang code sang Christmas Light nga ginabaligya.
Mahibaluan kun legal ang produkto kun kaangay ang nagaguwa nga company name, brand kag model sa cellphone kag sa nakatakatak sa box ukon plastic sang christmas light.
Pahayag ni Degala, sa tion nga mag error ang pag-scan sang produkto, mahimo gid ini nga mareport gilayon sa Department of Trade and Industry.
Apang magluwas sa mobile app sang ahensya, mahimo man nga mahibaluan kun iligal ang Christmas lights nga ginabaligya sa iya mismo nga wiring sa diin mas mahumok ini kag madasig nga mabali.
