Nagapatuman na ang Iloilo City Traffic and Transportation Management Office ukon ICTTMO sang nagkalain-lain nga tikang para maprotektahan ang kaayuhan sang mga traffic enforcers batuk sa epekto sang El Niño.
Sa interview sang Bombo Radyo kay ICTTMO Head Uldarico Garbanzos, iya ginpahayag nga ila ginapabug-atan ang importansya sang proper hydration samtang nagatrabaho ang mga traffic enforcers sa dalan agud malikawan ang heat-related nga balatian pareho sang heat stroke.
Suno sa iya, ginapahanumdom man ang mga personnel nga magdala sang payong kag iban pa nga kinahanglanon nga makabulig sa ila samtang naga-duty sa tunga sang init.
Pahayag pa ni Garbanzos nga ginahatagan sang ICTTMO sang kahigayunan ang ila mga personnel nga makapahuway anay sa mahandong kag mas presko nga lugar kon kinahanglan, ilabi na kon nagatagiti gid ang init.
Ginpahayag man sini nga plano sang ila opisina nga iban sa lugar nga indi tuman ka init ang ila mga personnel nga may yara sang balatian ukon maintenance nga gina-inom agud nga malikawan ang mga ini nga ma-fully expose sa init.
Dugang pa ni Garbanzos nga ila ginasigurado nga may yara sang nagakaigo nga pagpanghanda ang ila opisina sa posible nga pagpadayon sang mataas nga temperatura kag epekto sang El Niño sa mga masunod nga bulan agud malikaw sa peligro ang ila nga mga personnel.
