Ginpa-Bombo sang Iloilo Central Elementary School ang sitwasyon sang ila eskwelahan bangud ginpabay-an lang ini sang kontraktor matapos natukod ang isa ka 3-storey building.
Ini nga proyekto ang ginpatigayon sang Iloilo City District Engineering Office kag ang kontraktor amo ang Topmost Builders Corporation.
Sa interview sang Bombo Radyo kay Judy Fabular, Focal Person sang Interim Physical Facilities and School Safety sang eskwelahan, iya ginpahayag nga ginpabay-an lang ang mga kagamitan kag mga equipment nga nagalinapta.
Suno kay Fabular, naguba man ang classroom nga ginhimo nga bunkhouse sang mga construction workers.
Madamo man sang mga hazards kaangay sang nagawayway nga kuryente, nagalabaw nga mga tubo, kag iban pa nga delikado sa mga estudyante.
May naguba man nga porsyon sang pader gani nabutang sa risgo ang ila mga kagamitan nga posible kawaton.
Ginaproblema nila ini ilabi na nga manugbukas na ang klase sa Lunes.
Sa subong, nagapangabay ini sa Iloilo City District Engineering Office kag sa kontraktor sang proyekto nga balikdon man ang mga ila mga lapta kag i-restore ang naguba nga classroom.
Gintinguhaan sang Bombo Radyo nga magkuha sang paathag gikan sa Iloilo City District Engineering Office apang namalibad sila nga maghatag sang pahayag.
