Gin-anunsyo sang International Coalition for Human Rights in the Philippines (ICHRP) nga magapadala sila sang mga international observers’ para magbantay sa palaabuton nga 2025 Philippine midterm elections.
Ginpahayag sang ICHRP ang ila kabalaka matapos ang mga insidente sang human rights violations nga ila naobserbahan sa nagligad nga 2022 national elections nga ginalakipan sang mga kaso sang vote buying, kapaltahan sang electronic voting system, misinformation, red-tagging, mga banta, kag pagpamatay nga natabo sa tunga sang eleksyon.
Ginpat-od sang ICHRP nga ang ila desisyon nga magpadala liwat sang observers subong 2025 ginalakipan sang mas lawig nga konteksto, lakip na ang pag-aresto sang International Criminal Court (ICC) kay anay Presidente Rodrigo Duterte, kag ang wala pag-ilintindihanay tunga sang pamilya Marcos kag Duterte.
Magapamuno man ang ICHRP sang isa ka webinar sa Abril 23, 2025 nga may tema nga “The World is Watching: Philippine Elections 2025,” nga maga-diskusyon sa kaimportansya sang independent monitoring kag papel sini sa demokrasya.
