Ginabasol sang Independent Commission for Infrastructure (ICI) si anay Public Works Secretary Manuel Bonoan sa ginapahayag nga himbunanay sang pila ka mga inhenyero sang DPWH kag pribado nga kontratista sa P72.4-million nga “ghost” flood control project sa Plaridel, Bulacan.
Suno sa report sang ICI nga ginsumiter sa Office of the Ombudsman, natabo ang paggasto sang pondo sa idalom mismo sang liderato ni Bonoan.
Pahayag sang komisyon nga pasakaan si Bonoan sang kaso administratibo kaangay sang grave misconduct, gross dishonesty, kag paglapas sa Code of Conduct for Public Officials.
Lakip man sa manabat ang anay undersecretaries sang DPWH nga sanday Roberto Bernardo kag Maria Catalina Cabral.
Sa imbestigasyon, nagguwa nga wala sang napatindog nga flood control structure sa lugar apisar nga nabaydan na ini sang masobra P72 million sa kontratista nga Topnotch Catalyst Builders Inc.
Suno sa ICI, ang pagpabaya ni Bonoan ang “katumbas sang pagpangdaya”.
Ang report nga ini ang kabahin sang mas lapnagon nga imbestigasyon sa mga ginapahayag nga ghost kag overpriced projects sang DPWH nga ginsambit ni Presidente Ferdinand Marcos Jr. sa iya State of the Nation Address (SONA).
