Mahimo makonsiderar nga wala na sang pulos ang nabilin nga miyembro sang Independent Commission for Infrastructure (ICI) apisar isa ini ka retirado nga mahistrado.
Suno sa Constitutional law expert nga si Atty. Domingo Egon Cayosa, dako nga kadulaan ang mga naghalalin nga miyembro sang panel kag amo man ang mga imbestigador sini.
Dugang niya, redundant ang ICI bangud ginasulit lamang sini ang katungdanan sang Office of the Ombudsman nga may mas masangkad nga gahum batok sa kagarukan.
Ginpahayag man ni Cayosa nga ang Ombudsman may ara sang mandato nagikan sa konstitusyon kag may kina-iya ini nga suguon ang tanan nga ahensya sang gobyerno, law enforcement, investigatoty units kag Commission on Audit.
Dugang pa sini, mangin limitado lamang sa fact finding kag recommendatory power ang ICI gani indi na ini makahulag gid sang epektibo batok sa mga anomalya sa flood control projects.
Nagapati man si Cayosa nga mas mangin maayo kun ang Sandiganbayan kag ang korte ang magatalana sang kaugalingon sini nga deadlines para mapadali ang pagresolba sang mga kaso sa korapsyon.
Nagpanawagan man sila nga bantayan kag obligahon sang Ombudsman ang ila katungdanan bilang institusyon batok sa korapsyon nga nagakatabo sa pungsod.
