ILOILO CITY – Ginareklamo sang Iloilo City Loop Alliance of Jeepney Operators and Drivers Association ang tuhoy sa pag-limit sang Loading kag Unloading area sa Traffic Discipline Zone sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Operators and Drivers Association, iya ginpahayag nga nagareklamo ang mga pasahero nga tuman ka layo ang ila lakton agud lamang nga makapanaog kag makasakay.
Suno kay Parcon, may yara sang existing ordinance kun sa diin ang Loading kag Unloading areas nga naandan na sang mga driver kag pasahero apang bangud nga ginpatuman na ang Traffic Discipline Zone, nagatalang-talang ang kalabanan nga kun kaisa nagaresulta sa violations.
Ginpahayag ni Parcon nga wala sila nagapamatok sa ginapatuman nga Traffic Discipline Zone kundi ang ila nga ginahingyo amo nga sapulon ang tanan nga driver tuhoy sa mga pagsulundan.
May kaangtanan diri, ginpahayag sang natungdan nga may iban nga mga driver nga nagapasakay kag nagapapanaog sang pasahero sa naandan nga Loading kag Unloading Zone nga ginahatagan sang ticket sang traffic auxilliary bangud sa violations.
Samtang, gin-athag ni Public Safety and Transportation Management Office Head Jeck Conlu nga isa ka bulan nga experimentation ang ginapatuman sa Traffic Discipline Zone.
Suno kay Conlu, wala gin-suspend ang ordinansa tuhoy sa existing Loading kag Unloading Zone sa nasambit nga dalan apang kadungan sang pagpatuman sang Traffic Discipline Zone, may yara sang bag-o nga Loading kag Unloading Zones.
Ginpahayag ni Conlu nga ang mga public utility jeepney ang wala ginadakop kun magdulog sa existing Loading kag Unloading Zones kag may kaangtanan sa reklamo sang Iloilo City Loop Alliance of Jeepney Operators and Drivers Association, iya nga ipaidalom sa review ang listahan sang violators.
