ILOILO CITY – Indi mag-upod ang Iloilo City Loop Alliance of Jeepney Owners and Drivers Association sa nationwide transport strilke sa Setyembre 30 may kaangtanan sa pag-phaseout sa mga jeep kag UV Express service vehicles sa masunod nga tuig bilang kabahin sang Public Utility Vehicle modernization program sang gobyerno.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Owners and Drivers Association, iya ginpahayag nga kun mag-upod ang asosasyon sa transport strike, mahimo nga kanselahaon sang Office of Transportation Cooperatives ang ila accreditation certificate.
Suno kay Parcon, kun iduso gid nila ang ila kawsa, madula ang ila palangabuhian, gani mas pilion na lang nila nga indi na mag-upod sa transport strike.
Nahibaluan nga ang transport strike ang patigayunon sang Alliance of Concerned Transport Organizations, Pinagkaisang Samahan ng mga Tsuper at Operator Nationwide (PISTON) kag Stop and Go.
