ILOILO CITY – Walo ka karton sang face masks ang ginapaabot sang Iloilo City Loop Alliance of Jeepney Operators and Driver’s Association agud nga magamit gilayon sang mga driver sang Public Utility Jeepney.
Ini ang kasunod sang pagpaguwa sang Land Transportation Franchising and Regulatory Board sang memorandum circular nga nagamandu nga dapat magsuksok sang face mask ang mga driver sang Public Utility Vehicle bilang paglikaw sa Novel Coronavirus.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Operators and Driver’s Association, iya ginpahayag nga sa Lunes, Pebrero 3, ginalauman nga maga-abot ang walo ka karton sang face mask nga pagatrungaon sa tanan nga driver nga miyembro sang ila asosasyon.
Suno kay Parcon, magluwas sa walo ka karton, magabakal pa gid sila sang dugang nga face mask bangud sa subong, limitado lamang ang supply nga ginabaligya.
Ginpahayag ni Parcon nga kadungan sang public hearing sa Pebrero 4 may kaangtanan sa Traffic Discipline Zone, pagatalakayon man ang tuhoy sa kaundan sang memorandum circular sang Land Transportation Franchising and Regulatory Board.
