ILOILO CITY – Nagahulat na lamang sang approval nagikan sa bangko ang Iloilo City Loop Alliance of Jeepney Operators and Drivers Association para sa dugang nga 98 ka unit sang modernized jeepney.
Sa interview sang Bombo Radyo kay Mr. Reymundo Parcon, presidente sang grupo, iya ginpahayag nga wala naman sang kulang nga dokumento nga kinahanglan nga ipasa sa bangko.
Ginalauman nga indi na magdangat sa masunod nga tuig ang pag-abot sang bag-o nga mga units.
Naatrasar ini suno kay Parcon bangud sang suspendido sa gihapon nga Local Public Transport Route Plan sang syudad sang Iloilo.
Ang ini nga mga modernized jeepney ang may capacity nga 30 ka pasahero.
Matandaan nga sa syudad sang Iloilo, masami nga reklamo sa tagsa ka rush hour amo ang kakulang sang masakyan nga jeep bangud nga ang mga traditional jeepney ang nagagarahe na pag-abot sang alas-sais sa gab-i.
