ILOILO CITY – Nagpadala sang sulat ang Iloilo City Loop Alliance of Jeepney Operators and Drivers Association (ICLAJODA) sa pamunuan sang Public Safety Transportation Management Office (PSTMO).
Sa interview sang Bombo Radyo kay Raymundo Parcon, Presidente sang ICLAJODA, iya ginpahayag nga ang nasaad sa sulat amo ang mga reklamo sang mga driver kag operator sa syudad sang Iloilo.
Una nga reklamo amo nga ang mga barker ang nagapangayo-kayo sang P20 sa mga driver sa diin ang tunga sang ila ginapangayo ang ginahatag man sa mgaTraffic Aide.
Ika-duha amo ang iban nga mga traffic aide ang nagapangayo man sang P20 direkta sa mga driver kun nagabyahe ang jeep pakadto kag pabalik sa ila nahamtangan.
Ika-tatlo amo nga ang mga traffic aides ang nagapangayo pa sang pagkaon sa mga driver.
Ika-apat sa sulat amo nga ginamanduan sang mga traffic aide ang mga driver nga baklan sila sang tubig kag pagkaon apisar wala na sila sa oras sang trabaho.
Ika-lima amo nga ang mga provincial jeepneys ang ginapahanugutan nga makasulod sa syudad apisar nga wala man sang mga lisensya.
Ika-anom amo ang insidente nga natabo sa San Rafael Mandurriao, Iloilo City sa diin ginpabay-an lamang sang traffic aide ang barker nga tapungolon ang driver bangud wala siya ginhatagan sang kwarta sang driver.
Kag ang pinaka-ulihi amo ang masami nga paggamit sang mga driver sang Loading kag Unloading area bilang terminal sa atubang sa Western Visayas Medical Center sa diin indi ini nagakadapat.
Sa subong, nagalaum si Parcon nga masolusyonan sang PSTMO ang mga nasambit nga reklamo.
