ILOILO CITY – Nagpasa na sang posistion paper ang Iloilo City Loop Alliance of Jeepney Operators and Driver Associations (ICLAJODA) sa Iloilo City Government.
Ini ang may kaangtanan sa ginaduso ni Iloilo City Councilor Lyndon Acap nga Anti-Counterflow ordinance.
Sa interview sang Bombo Radyo kay Raymundo ‘Boyet’ Parcon, pinuno sang ICLAJODA, iya ginpahayag nga balik-awot ang ginaduso nga ordinansa Acap.
Suno kay Parcon, ila na napasa sa Committee on Transportation kag sa Public Safety Transportation Management Office (PSTMO).
Pahayag pa ni Parcon, indi mahimo mapatuman sa syudad sang Iloilo ang nasambit nga ordinansa bangud makitid kag halos 2 lanes lang ang mga dalan.
Madamo naman ang ordinansa suno kay Parcon nga wala napatuman kaangay sang Anti-double parking, Clamping ordinance, Speed limit ordinance kag iban pa.
Mangin apektado naman ang byahe sang mga pampubliko nga salakyan suno kay Parcon bangud nagalagas man sila sang oras nga mangin maayo ang ila pagbyahe.
Ginklaro man niya nga wala sila nagakontra sa mga ordinansa nga makapaayo sa syudad sa baylo ang ila pagpamatok ang may kaangtanan sa huol nga ituga sa mga pasahero kag mga nagabyahe sang pampubliko nga mga salakyan.
