ILOILO CITY – Magapadayon sa pagbyahe ang tanan nga jeepney units sang Iloilo City Loop Alliance of Jeepney Operators and Drivers Association (ICLAJODA) apisar sang istrikto nga pagpatuman sang 1-meter nga physical distance sa tanan nga Public Utility Vehicles.
Ini ang ginpahayag sa Bombo Radyo ni Raymundo “Boyet” Parcon, Presidente sang ICLAJODA kasunod sang pag-anunsyo sang iban nga transport groups nga magapatigayon sang transport strike bangud sa ginapatuman nga one seat apart policy.
Suno kay Parcon, mas ginapili na lang sang mga operator nga magpamiyerdihan agud lamang nga makapadayon sa pagbyahe ang mga driver nga nagaserbe nga bread winner sang pamilya.
Ginpahayag ni Parcon nga nagpamigado ang kita sang jeepney drivers kag operators sang ginpatuman ang 50% nga maximum passenger capacity apang mas maayo na lang ini kun ipaanggid sa subong nga 7 na lang ka pasahero ang mahimo nga makasakay sa tagsa ka PUJ.
Magluwas sa tuman ka pigado nga kita sa pagbyahe sang jeep, ginpahayag sang ICLAJODA president nga may mga driver man nga wala anay nakabalik sa trabaho bangud ginpaidalom sa total lockdown ang ila lugar.
May kaangtanan diri, gina abi-abi gid sang ICLAJODA ang ano man nga bulig nga ihatag sang Iloilo City Government kag sang mga pribado nga indibidwal.
