ILOILO CITY- Ginmando na ni Iloilo City Police Office Director Police Colonel Joeresty Coronica ang maid-id nga imbestigasyon sa identity sang tag- iya sang duha ka gin- utod nga kamot nga narekober sa Zone 2, Brgy. Ticud, Lapaz kag lawas nga wala sang ulo kag kamot nga nakit-an sa Brgy. Buhang, Jaro, Iloilo City.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga ginatugyan ni Coronica sa mga station commanders kag mga imbestigador ang pagpadalom sang imbestigasyon agud madasig nga masolbar ang kaso.
Suno kay Coronica, wala sang lugar sa syudad sang Iloilo nga may mga pumuluyo nga nagahatag sang importansiya sa kabuhi ang amo nga sahi sang krimen.
Ginpasiguro naman sini nga paagi sa bulig sang komunidad kag iban nga law enforcement units, makilal-an ang biktima kag matumod ang motibo sa brutal nga pagpatay sa iya.
