Ginkakas sa pwesto sanday Iloilo City Police Office (ICPO) Director Police Colonel Kim Legada kag Iloilo City Police Station 2 Commander Police Captain Jeffrey Delgado.
Ini ang kasunod sang ginapahayag nga lapses sa imbestigasyon kaangot sa kamatayon ni Duenas, Iloilo Vice Mayor Aimee Paz Lamasan.
Suno kay Police Regional Office (PRO) VI Director Police Brigadier General Josefino Ligan, temporaryo anay nga iga-assign sanday Legada kag Delgado sa PRO VI headquarters ukon sa Campo Delgado.
Sandig sa kumpirmasyon ni Ligan, magaserbe ang PRO VI Deputy Regional Director for Operations nga si Police Colonel Roland Bulalacao bilang officer-in-charge sang ICPO.
Ini nga tikang ang kasunod sang personal nga pagbisita ni Department of the Interior and Local Government (DILG) Secretary Jonvic Remulla sa syudad sang Iloilo kadungan sang lubong ni Lamasan.
Ginpahayag anay sang tiglikom nga palpak ang nangin imbestigasyon sa kamatayon sang vice mayor.
Ginmensyonar man sang opisyal nga 36 ka oras pa ang nagligad kag napatay na ang biktima antes nag-imbestigar ang mga kapulisan sa insidente.
Una na nga ginkumpirma sang awtoridad nga accidental firing ang natabo kay Lamasan nga nangin rason sang kamatayon sini sa bisperas sang Bag-ong Tuig.
