ILOILO CITY- Mas mahapos na subong ang pagdakop sa mga drug personalities sa Syudad sang Iloilo.
Sa interview sang Bombo Radyo kay Police Colonel Martin Defensor Jr., director sang Iloilo City Police Office, iya ginpahayag nga bangud ilisipon nalang ang mga naga-involved sa illegal drug trade sa syudad, mas mahapos nga i-monitor kag i-operate ang mga ini.
Suno kay Col. Defensor, kalabanan sa mga nagapatigayon sang illegal drug trade ang mga free lancer kag newly identified nga mga personalidad nga may kwarta bilang kapital.
Ginpahayag ni Defensor nga plano sang mga newly identified drug personalities nga magtukod sang drug group diri sa syudad bangud mas dako ang ginansya diri tuga sa mas mahal nga presyo sang illegal drugs nga resulta sang mas manubo nga suplay diri sa Iloilo.
Gindugang man ni Defensor nga ang na-monitor nga mga users amo ang ila ginahimo nga source sang impormasyon agud matumod kun sa diin ang mga ini nagabakal kag amo naman ang gina-operate sang otoridad paagi sa drug buybust.
Gintuad naman sang Iloilo City Police Office director nga kalabanan sa mga madakpan nga subject sa buybust operation ang nagaako nga sa New Bilibid Prison sa Muntinlupa nagahalin ang ila transaksyon sang illegal drugs.
Samtang, posible naman nga mga drug personalities man ang sa likod sang mga riding in tandem incidents sa Syudad sang Iloilo.
Suno kay Defensor, base sa intelligence report, bangud nga may mga kwarta ang mga drug personalities, may ikasarang ang mga ini nga magpatukod sang grupo nga mahimo gamiton agud maghimo sang mga krimen.
Apang suno kay Defensor, wala pa sila sang ebidensya.
Ginpanginwala naman niya nga katapo man sang kapulisan ang nagapanumba sa mga drug personalities.
Pahayag pa ni Defensor, wala na lang kuntani sila nagapatigayon sang buy bust operation kun patyon na man nila ang mga involved sa illegal drug activities.
