ILOILO CITY – Nagpasalig ang Iloilo City Police Office nga wala sang dapat kabalak-an ang mga pumuluyo matapos nga nasapwan ang lawas sang bangkay sa Iloilo River sa Parola Area nga sakop sang Concepcion, Iloilo City Proper.
Ang biktima amo si Raymond Castro, 43, residente sang Barangay Simon Ledesma, Jaro, Iloilo City.
Matandaan nga antes ang krimen, kaupod ni Castro si alyas Bulag nga gin-abduct sang wala pa makilal-an nga mga indibidwal, kag ginpasulod sa isa ka sports utility vehicle.
Sa interview sang Bombo Radyo kay Police Colonel Joeresty Coronica, director sang Iloilo City Police Office, iya ginpahayag nga makaisa lamang ka bes natabo ang insidente kun sa diin mas maayo nga hulaton ang imbestigasyon antes maghatag sang spekulasyon.
Suno kay Coronica, indi na niya luyag nga maliwat ang kaangay nga insidente, rason nga ginapaaligmat sini ang tanan niya nga mga station commanders.
Sa subong, padayon pa ang imbestigasyon sang mga kapulisan sa insidente samtang ginapasangkad ang pagptrolya kag pag-conduct sang checkpoints sa syudad agud masiguro ang seguridad sang mga pumuluyo.
