ILOILO CITY – Wala pa nahibalu-an sang Iloilo City Police Office ang matuod nga motibo sa pagluthang-patay sa ginapahayag civilian agent sang National Bureau of Investigation sa Brgy. Democracia, Jaro, Iloilo City.
Sa interview sang Bomo Radyo kay Iloilo City Police Office Director Police Col. Eric Dampal, liwat niya nga ginpahayag nga iya na nga ginmandu-an ang chief of police sang Jaro Police Station nga imbestigaran sang maayo ang pagpatay kay Angel Lademora sang Brgy. Camiri, San Enrique, Iloilo.
Suno kay Dampal, mas makapaayo pa gid kun masolbar sa labing madali nga tion ang nasambit nga krimen.
Samtang, wala pa sang may gina-uyatan nga background ang Iloilo City Police Office tuhoy sa biktima nga nasapwan sa Brgy. Sooc sa distrito sang Arevalo.
Nahibalu-an nga sang damlag lang, nasapwan-patay ang biktima nga si Christian Cofreros, 29, pamilyado sang Purok Kawayan, Brgy. Banago, Bacolod City kag nagatrabaho sa isa ka lending company.
Sa pagpaathag ni City Police Office Director Police Col. Eric Dampal, pagkasunod pa nga adlaw nakumpirma sang pamilya nga ila himata ang nasapwan nga bangkay.
Kasubong sa iban nga mga krimen, ginpahayag ni Dampal nga indi pa matumod ang matuod nga motibo sa krimen kag iya na nga ginmandu-an ang hepe sang Arevalo Police Station nga solbaron ang kaso.
