ILOILO CITY – Padayon ang monitoring sang Iloilo City Police Office (ICPO) sa ginaalegar baligyaanay sang COVID-19 vaccination tickets sa syudad sang Iloilo.
Sang nagligad nga semana, nagmandu si Iloilo City Mayor Jerry Treñas nga usisaon ang report nga iya nabaton nga may nagatanyag sang vaccination ticket malapit sa inoculation site kabaylo sang P3,000.
Sa interview sang Bombo Radyo kay Police Col. Uldarico Garbanzos, director sang ICPO, iya ginpahayag nga napakig-angutan na nila ang tawo nga nagreport sa alkalde.
Santo sa panaysayon sang nag-report, indi na niya matandaan ang nawong sang lalaki nga nag-approach sa iya para sa ginabaligya sini nga ticket.
Posible suno kay Garbanzos nga personal nga ticket ang ibaligya sang lalaki bangud wala na ini sang kwarta, ukon posible man nga may ‘hapaw nga koneksyon’ sa sulod sang vaccination site kag nagapalusot sang ticket.
Liwat nga gin-athag sang ICPO director nga wala sang bayad ang pre-registration sa syudad, ang vaccination ticket, kag mangin ang bakuna.
