ILOILO CITY- Gin-athag sang Iloilo City Police Office nga indi makabig nga criminal gangs ang grupo sang mga pamatan-on nga involved sa mga kinagamo kag rambol sa palibot sang syudad.
Sa interview sang Bombo Radyo kay PMaj Shella Mae Sangrines, spokesperson sang Iloilo City Police Office, iya ginpahayag nga mga ordinaryo nga grupo lang ini sang mga kabataan nga makabig nga mga children at risk.
Suno kay Sangrines, kalabanan sa ila ang nagaedad 12- anyos tubtob 17- anyos.
Pahayag ni Sangrines, sa masami, ini nga kabataan amo ang mga violators sang curfew ordinance.
Dugang sang natungdan, sa syudad, may yara sang 28 ka grupo sang mga pamatan-on ang il narecord kag ang naka-reach out na man ang kapulisan sa sini nga mga grupo kag padayon man ang mga ini nga ginamonitor.
Nagapati naman si Sangrines nga samtang may ginapatigayon nga mga intervention para sa sini nga mga kabataan, sa barangay level kag sa bulig sang iban nga mga ahensya sang gobyerno kalakip na ang Iloilo City Police Office, mabuligan gid ang mga ini nga magtadlong ang ila mga banas.
