Wala sang kahilabtanan si Mayor Raisa Treñas sa desisyon sang Iloilo City Police Office nga i-relieve ang tatlo ka police personnel sang Iloilo City Police Station 2.
Ini may kaangtanan sa natabo nga shooting incident sa Distrito sang La Paz kaagahon sang Oktubre 11 kun sa diin pakaduha sang alkalde ang suspek sa hit-and-run.
Suno kay ICPO Director Pcol. Wilbert Parilla, kabahin sang ”standard operating procedure” sang kapulisan ang pag-relieve kag dapat nga isumiter sa forensic operation ang armas nga gingamit sa operasyon.
Nahibaluan nga 11 ka basiyo sang armas ang narecover sa lugar kun sa diin nagluntad ang insidente.
Pahayag pa ni Parilla, gin-assign anay sa administrative duties ang tatlo ka mga pulis, nga may position nga corporal ang duha sa ila kag isa ka master sergeant samtang padayon nga ginahibalo kun nasunod ang police operational procedures.
Dugang pa ni Parilla, kinahanglan mahibaluan anay kun may ara sang lapses sa insidente agud madula ang mga ekspekulasyon bangud pariente sang alkalde ang suspek.
Nahibaluan nga nagmandu man si National Police Commission (NAPOLCOM) Commissioner Ralph Calinisan sa NAPOLCOM 6 nga imbestigaran ang pagresponde sang tatlo ka mga pulis sa awto nga nagpalagyo kag pabor man si Parilla sa motu proprio investigation.
