ILOILO CITY – Ginhangkat sang Iloilo City Police Office ang mga newly elected barangay officials nga pabaskugon pa ang ila tagsa ka Barangay Anti-Drug Abuse Council.
Ang Barangay Anti-Drug Abuse Council ang isa ka multi- sector council nga ginabug-usan sang local officials kag pila ka mga tiglawas nagikan sa nagkalain-lain nga community organizations, lakip na ang pulis, nga gintukod agud nga magpanguna sa pagplano, pagpatuman kag pag-monitor sang tanan nga local anti-drug abuse programs, mga proyekto kag aktibidad sa barangay level.
Sila man ang naga-report sa Philippine National Police kag sa Philippine Drug Enforcement Agency sang listahan sang mga residente nga involved sa illegal drug operation.
Sa interview sang Bombo Radyo kay Police Colonel Joeresty Coronica, director sang Iloilo City Police Office, iya ginpahayag nga dako ang bulig sang amo nga council sa kampanya sang kapulisan kun functional lamang ini.
Suno kay Coronica, gina-apresyar gid nila ang ginapasa nga listahan sang council apang gin-athag niya nga may yara man sila sang kaugalingon nga intelligence monitoring.
Pahayag niya, ang pangalan sa listahan sang council kag ang na-identify sang kapulisan ang kun kaisa, wala man nagasanto.
Sa syudad sang Iloilo, ginpahayag ni Coronica nga may mga Barangay Anti-Drug Abuse Council nga aktibo kag may yara man nga “for compliance” lamang.
