Ginaimbestigaran na sang Iloilo City Police Office (ICPO) ang kaso sang isa ka pulis nga nanumbag sang isa ka sibilyan sa Barangay Calumpang, Molo, Iloilo City.
Ang pulis amo si Patrolman Jesus Palmos, naga-duty sa Iloilo City Police Station 3, residente sang Sta. Cruz, Arevalo, Iloilo City.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga aksidente nga nabungguan sang sibilyan ang naka-park nga side-car nga motorsiklo lakip na ang motor sang nasambit nga pulis.
Bangud diri, wala nag-intindahanay ang duha ka kampo kon sa diin, naglambot gid sa pagsumbaganay.
Suno kay Sangrines, may nakita nga rason ang kapulisan agud nga pasakaan sang kaso nga physical injury kag dakpon ang amo nga pulis.
Nagpanindugan man ang natungdan nga wala sang ginatolerar ang ila talatapan bangud napasaka ang mga nagakaigo nga tikang batok sa pulis.
Sa subong, nakapyansa na ang pulis apang padayon nga gina-imbestigaran sang otoridad kasunod sang internal rules sang kapulisan.
