Ginapasiguro sang Iloilo City Police Office ukon ICPO nga magapangatubang sang nagakaigo nga kaso ang bisan sin-o nga mapamatud-an nga yara sa likod sang mga online threat sa mga eskwelahan sa syudad, bisan pa menor de edad ini.
Kasunod ini sang sunod-sunod nga report sang threats nga nabaton sa mga eskwelahan sa syudad sang Iloilo halin pa sang nagligad nga semana.
Sa interview sang Bombo Radyo kay ICPO Director PCol. Wilbert Parilla, iya ginpahayag nga seryoso ang kapulisan sa pag-address sang mga nagapadala sang mga security threat, ilabi na sa natabo nga pagpamahog sa Jaro National High School.
Suno kay Parilla, iya na nga ginmanduan ang hepe sang Iloilo City Police Station 9 nga imbestigaran ang ginhalin sang mensahe agud mahibaluan ang motibo sang nagapamahog.
Sa subong ginahulat na lamang ang resulta sang imbestigasyon para makila-an ang responsable sini.
Nagpahanumdom naman ini sa mga ginikanan kag faculty members nga direkta nga i-report sa kapulisan ang bisan ano nga impormasyon nga makatuga sang kakugmat, imbes nga ipalapta paagi sa social media.
Gindugang pa ni Parilla nga ila ginahimo sang ICPO ang tanan nga masarangan para makadugang sang police personnel nga ma-deploy sa mga eskwelahan, pampubliko man ukon pribado, bilang kabahin sang seguridad sang mga estudyante.
