ILOILO CITY – Gindayaw sang Iloilo City Police Office (ICPO) ang Massive Tree-Planting Activity nga ginpatigayon sang Iloilo City Government subong nga adlaw sa Brgy. Buhang, Jaro, Iloilo City.
Sa interview sang Bombo Radyo kay ICPO Director Police Col. Martin Defensor Jr., iya ginpahayag nga mismo sila sa ICPO ang may yara sang garden sa diin lakip sa mga tanum amo ang utan kag fruit-bearing trees.
Suno kay Defensor, isa siya ka advocate sang pagpananum sang kahoy kag pagtipig sa dunang-manggad.
Sa ginpatigayon nga Tree-Planting Activity kaina sang aga, ginpahayag ni Defensor nga magluwas sa pagbantay sa seguridad, nagbulig man sa pagtanom sang kahoy ang mga pulis sa syudad sang Iloilo.
Ginpahayag ni Defensor nga manami sa pamatyagan kun madamu sang kahoy kag matinlo ang palibot.
Bilang ICPO Director, ginpahayag sang natungdan nga iya gina-enggyanyo ang publiko nga mangin matinlo sa pagginawi.
