Ginhatagan sang 10 out 10 nga grado sang Iloilo City Police Office (ICPO) si Iloilo City Mayor Jerry Treñas sa iya nga State of the City Address (SOCA) 2024.
Sa interview sang Bombo Radyo kay Police Colonel Kim Legada, Director sang Iloilo City Police Office, iya ginpahayag nga nangin successful ang pagdugang sang apat ka bag-o nga mga police stations sa syudad.
Suno kay Legada, tuman ka “significant” ang tikang kag nangin bulig sang syudad sa pagtukod sang mga police stations ilabi na sa kampanya sang talatapan batok sa mga kirimanalidad.
Gintumod man sini nga importante ang nangin rolyo sang city government sa ila pagpakigbato batok sa iligal nga druga sa syudad.
Gin-athag man sang natungdan nga normal lang sa ila nga bahin ang ma-pressure bangud apisar nga wala sang mando sang alkalde, ginaubra nila ang dapat ubrahon agud mapabilin ang peace and order.
Nagpasalig man si Legada nga ginasunod sang iya nasakopan nga katapo ang luyag sang city government, Philippine National Police (PNP), kag Local Government Unit (LGU).
