Ginpasigurado sang Iloilo City Police Office (ICPO) nga padayon ang ila nga monitoring sa mga rebelde nga grupo nga may warrant of arrest nga nagatinir sa syudad.
Sa interview sang Bombo Radyo kay Police Colonel Kim Legada, Director sang Iloilo City Police Office, iya ginpahayag nga padayon ang ila pagkoordinar sa Philippine Army agud nga mas mapasangkad ang pagbantay sa syudad sa mga myembro sang rebelde nga grupo.
Suno kay Legada, na-develop sang nagligad nga bulan ang operasyon nga nagabantay sa mga katapo sang rebelde nga mas ginpili nga magtinir sa syudad apisar sang warrant of arrest.
Gin-athag man sini nga ang pag-aresto sa mga subject ang ‘significant accomplishment’ sa bahin sang kapulisan.
Nahibaluan nga sang damlag lang, naaresto ang duha ka mga myembro sang rebelde nga grupo nga may mataas nga posisyon kasunod sang highly coordinated operation nga ginpangunahan sang Iloilo City Police Office sa Arevalo, Iloilo City.
Ang nadakpan amo sanday alyas Pendong nga kilala man sa pangalan nga Wil, Asyong, Winston, Greg, Tom, kag Duroy. 74-anyos, miyembro sang Central Committee sang CTG kag anay Secretary sang Komiteng Rehiyon-Panay (KR-P).
Lakip diri si alyas Jofel, 42-anyos nga anay katapo sang Communist Terrorist Group (CTG) kag naga-akto bilang isa ka medic kag residente sang Barangay Purok 2, Pavia, Iloilo.
