Ginpasiguro sang Iloilo City Police Office (ICPO) nga hugot gid ang ila pagbantay sa seguridad sa tion sang nagahilapit nga Dinagyang Festival.
Ini agud malikawan ang bisan ano nga posible nga ilegal nga aktibidad samtang nagapatiagyon ang syudad sang Festival.
Sa interview sang Bombo Radyo kay PMAJ. Shiela Mae Sangrines spokesperson sang ICPO, iya ginpahayag nga mas ginpabaskog pa gid sang ICPO ang ila pagmonitor kag high-level awareness.
Ilabi na bangud daku ang ginapatigayon nga mga aktibidad kag ginapaabot ang madamo nga festival-goers sa syudad.
Gindugang pa nga padayon ang koordinasyon sang kapulisan sa nagkalain-lain nga yunit, agud masiguro ang malinong nga selebrasyon.
Suno sa City Director sang ICPO, pasangkaron pa gid ang mga monitoring kag reminder activities, lakip na ang hugot nga pagpadalagan sang Drug Operating Unit sa pagmonitor para sa Dinagyang Festival.
Ginpanawagan man ang publiko nga magsunod gid sa ginapatuman nga safety protocols kag likawan ang mga ginaprohibit nga butang kag aktibidad, agud mapabilin ang kahilwayan kag kalinong sang selebrasyon.
Ginpasalig sang ICPO nga handa gid sila nga mangin alerto kag magserbisyo para sa seguridad sang tanan.
